في عنيها
وألف حكاية وحكاية
وكام موجة ورا موجة
وامواجها بلا نهاية
ساعات تهدا كما الفرحة
ساعات تعلا تكون جارحة
ساعات مشتاقة ومسامحة
ساعات للحب نسّاية
وفي عنيها قمر ونجوم
وفي عنيها دموع وهموم
وفي عنيها كلام مكتوم
ودنيا غريبة أسّاية
وفي عنيها لقيت أفراح
وفي عنيها خصام وسماح
وفي عنيها أمل وجراح
وألف رواية ورواية
لقيت فيها لُقا العشاق
حبيب لحبيبه كان مشتاق
وجوه عنيها في اشواق
وكام ضحكة وبسماية
وبسمتها بتحضني
وضحكتها تطمنى
وحاسس انها منى
لقيتها عايشة جوايا
ليست هناك تعليقات:
إرسال تعليق